Hindi maaaring pagsabayin ang 20% senior citizen discount at iba pang promotional discounts, ayon sa pasya ng Supreme Court (SC) noong October 14, 2026.
Ito ay matapos pumanig ng Korte sa isang hotel general manager sa Bacolod na inireklamo ng dalawang senior citizen dahil umano sa paglabag sa Republic Act No. 7432 o Senior Citizens Act.
Itinataguyod ng naturang batas ang pagbibigay ng benefits and privileges sa mga Pilipinong edad 60 pataas, kabilang ang 20% discount sa mga eligible products and services.
Inireklamo ang manager dahil tumanggi umano itong bigyan ng 20% discount ang dalawang senior.
Depensa ng manager, nakatanggap na ng 20% discount ang dalawa dahil sa membership nila sa isang bikers club.
“When goods or services are offered at promotional prices, senior citizens may choose either the promotional discount or the 20% senior citizen discount, whichever gives them greater savings,” paliwanag ng Korte.
Binigyang-diin din ng SC na dapat ding maging patas at makatuwiran ang pagpapatupad ng Senior Citizens Act para sa mga negosyo.
Saad nito, “The State’s pursuit of public welfare cannot be allowed to impose undue or confiscatory burdens on private establishments, whose continued viability is essential to the long-term effectiveness of the law.”