Pormal nang idineklara ng International Criminal Court (ICC) na may sapat na kapasidad si dating Pangulong Rodrigo Duterte upang humarap sa paglilitis kaugnay ng mga kasong crimes against humanity na nag-ugat sa madugong kampanya ng kanyang administrasyon laban sa ilegal na droga.

Batay sa desisyon ng ICC Trial Chamber III na isinapubliko nitong Oktubre 8, nakumbinsi ang mga hukom na kaya pa ng 81-anyos na akusado na epektibong gamitin ang kanyang karapatan para sa isang patas na paglilitis. Ang pasya, na orihinal na nilagdaan noong Setyembre 28, ay ginawa matapos pag-aralan ang mga resulta ng serye ng pagsusuri mula sa isang independent panel of experts gayundin ang mga isinumiteng mosyon ng prosekusyon at depensa.

Ayon sa naging hatol ng expert panel, malinaw na nauunawaan ni Duterte ang mga paratang laban sa kanya, ang mga ebidensya, at maging ang layunin at posibleng kahihinatnan ng proseso. May kakayahan din umano itong subaybayan ang takbo ng paglilitis at magbigay ng maayos na direktiba sa kanyang mga abogado para sa gagawing pagdepensa.

Kasabay ng desisyong ito, ibinasura ng kamara ang ilang kahilingan ng kampo ng dating pangulo. Kabilang sa mga ibinasura ay ang hirit na karagdagang medical examination, ang mosyong gisahin ang binuong expert panel, at ang naunang hiling para sa isang oral hearing. Gayunpaman, kinonsidera ng ICC ang rekomendasyon na ibase sa kalagayan ng akusado at ng mga testigo ang itatakdang oras at haba ng bawat araw ng pagdinig.

Nakatakdang magsimula ang pormal na paglilitis kay Duterte sa Nobyembre 30. Unang personal na humarap sa internasyonal na korte ang dating lider noong kalagitnaan ng Setyembre.

Nahaharap ang dating pangulo sa tatlong bilang ng crimes against humanity, kung saan inaakusahan siya ng mga prosecutor na may direktang kinalaman sa hindi bababa sa 76 na pagpatay na nangyari mula 2013 hanggang 2018. Sumasaklaw ang panahong ito sa kanyang huling termino bilang alkalde ng Lungsod ng Davao at sa mga unang taon ng kanyang pamumuno sa Pilipinas mula 2016 hanggang 2022.

Si Duterte ang kauna-unahang dating pinuno ng isang estado sa Asya na haharap sa paglilitis sa ICC, ang tribunal na nag-iimbestiga at umuusig sa mga pinakamabibigat na krimen sa buong mundo.

(COURTESY: Kaxandra Salonga / ABS-CBN News)

Muling ipinagpaliban ng Quezon City Regional Trial Court (RTC) nitong Biyernes ang pagbasa ng sakdal o arraignment kay Bise Presidente Sara Duterte kaugnay ng tatlong kaso ng grave threats, habang hinihintay ang resolusyon sa mga nakabinbing mosyon ng kanyang kampo sa mababa at mataas na kapulungan ng korte.

Ayon sa legal counsel ni Duterte na si Atty. Paul Lawrence Lim, naghain sila ng “motion for partial reconsideration” upang hilingin na muling suriin ng korte ang bahagi ng naunang utos nito na nagbasura sa kanilang hiling na mag-inhibit sa kaso si Presiding Judge Maria Angelica De Ramos.

“Dahil kailangan papag-aralan ito ng ating kagalang-galang na hukom at pati dahil sa pending petition for certiorari sa SC [Supreme Court], minabuti ng presiding judge na pag-aralan muna ang lahat ng bagay na ito... i-cancel muna ang hearing at i-reset to some other date,” pahayag ni Lim sa mga mamamahayag.

Tumanggi si Lim na isapubliko ang panibagong petsa ng pagbasa ng sakdal bilang paggalang sa proseso. “Now that other date hindi ko muna babanggitin. Pasensya na. I would rather manggaling sa court or prosecution kung gusto nila, but to respect the court ayaw ko muna ibigay ang date ngayon,” dagdag niya.

Matatandaang unang na-reset ang arraignment noong Setyembre 11 matapos akusahan ng kampo ni Duterte ang hukom ng pagkiling, kung saan iginiit nilang tinulungan umano ni De Ramos ang prosekusyon. Ibinasura ito ng korte noong Setyembre 14, kaya’t napilitan ang kampo ng bise presidente na umapela muli sa pamamagitan ng partial reconsideration.

Ang mga kasong kriminal ay nag-ugat sa pahayag ni Duterte noong Nobyembre 2024 patungkol sa umano’y planong pagpapapatay kina Pangulong Ferdinand Marcos Jr., First Lady Liza Araneta-Marcos, at noo’y House Speaker Martin Romualdez sakaling may mangyaring masama sa kanya.

Bukod sa mosyon sa QC RTC, umaasa rin ang kampo ni Duterte sa agarang aksyon ng Korte Suprema kaugnay ng inihain nilang petition for certiorari na humihingi ng temporary restraining order (TRO) upang tuluyang ipatigil ang pagdinig sa RTC.

Iginigiit ng mga abogado na walang hurisdiksyon ang RTC dahil hindi maaaring sampahan ng kasong kriminal ang isang opisyal na tulad ni Duterte nang hindi muna dumadaan sa impeachment.

“Until siya either ma-impeach or ma-convict by impeachment or mag-resign or bumaba sa kanyang pwesto... yan ang limited procedural immunity na hindi lamang ang bise-presidente ang nag-e-enjoy, lahat ng impeachable officer,” paliwanag ni Lim.

Nilinaw din ng abogado na nakadepende na sa magiging aksyon ng Korte Suprema at ng RTC judge kung matutuloy ang mga susunod na hakbang sa kaso.

“Depende na ‘yan kung maglabas ng utos ng TRO o status quo ante order ang SC. Kailangan nilang galangin ng hukom natin sa RTC. Pag hindi man ito ilabas, nasa hukom na ‘yan, RTC judge na ‘yan kung itutuloy pa rin niya ang arraignment or ide-defer pa rin niya habang inaabangan ang action ng SC,” saad ni Lim.

Dumating si Duterte sa QC Hall of Justice lulan ng isang van dakong 8:28 ng umaga. Bago umalis makalipas ang halos kalahating oras, sandali siyang nakisalamuha at nagpaabot ng pasasalamat sa kanyang mga taga-suporta at mga abogado para sa “masigasig na paggawa sa kanilang trabaho.”

Pormal nang sumapi si Senador Mark Villar sa hanay ng mayorya sa Senado, kasabay ng kanyang pagkahalal sa mga bagong posisyon kabilang ang pagiging chairman ng Committee on Public Works at miyembro ng makapangyarihang Commission on Appointments o CA.

Nilinaw ni Senate Majority Leader Juan Miguel Zubiri na ang paglipat ay sariling desisyon ni Villar upang maging “mas produktibo,” at itinangging may kinalaman ito sa pagbuo ng sapat na bilang ng boto para sa isang posibleng impeachment trial.

“He wants to join the majority to be more productive. So we welcome [him]. No politics involved,” pahayag ni Zubiri.

Ayon sa Senate Majority Leader - si Villar mismo ang nakiusap na lumipat dahil marami itong panukalang nais ipasa at nagpaplano ring umikot sa iba’t ibang bahagi ng bansa para sa pagbuo ng consensus.

Sa pag-apruba ng Senado, ipinaubaya ni Zubiri kay Villar ang kanyang sariling pwesto sa CA. Samantala, mismong si Senate President Pro Tempore Tito Sotto ang nag-segunda sa mosyon na ibigay sa senador ang pamumuno ng komite sa public works, isang pwestong dati na nitong hinawakan.

Bago ang paglipat sa mayorya, pinamunuan ni Villar ang Committee on Trade, Commerce, and Entrepreneurship, at ang Committee on Banks, Financial Institutions, and Currencies. Ang kanyang panibagong papel sa public works ay direktang akma sa kanyang naging karanasan bilang dating kalihim ng Department of Public Works and Highways o DPWH.

Nang tanungin kung may iba pang senador mula sa minorya na inaasahang lilipat, sinabi ni Zubiri na wala siyang tiyak na impormasyon ngunit bukas ang kanilang hanay. Iginiit niyang lahat ng miyembro ng minorya ay malugod nilang tatanggapin kung sakaling naisin din nilang sumapi sa mayorya.

(COURTESY: Jonvic Remulla/Facebook & Vice Mayor Harold Respicio/Facebook)

Ibinalik na ni Department of Interior and Local Government Secretary Jonvic Remulla ang ginastos ni Reina Mercedes, Isabela Vice Mayor Harold Respicio para sa isinagawa niyang drug test na may halagang P28,011 ngayong araw, October 8.

Nag-post ng screenshot ng money transfer si Remulla sa comments section sa isang Facebook post ni Respicio na may caption na, “Eto na. Happy?”

“You make me happy, jonvic,” hirit naman ni Respicio.

Naunang nag-post ang bise alkalde ng kanyang QR code sa Facebook at sinabihan si Remulla na ibalik ang nagastos niya para sa drug test.

Ibinahagi rin ni Respicio kahapon, October 7, ang negatibong resulta ng kanyang drug test.

“Congratulations. Now that it’s confirmed that he’s not on shabu, totoo na talaga na natural ang sayad ng utak niya,” patutsada ni Remulla.

Nagpa-drug test si Respicio matapos siyang hamunin ni Remulla dahil mukha umanong wala sa tamang pag-iisip ang bise alkalde matapos kumalat sa social media ang video nitong naninigaw sa isang Sangguniang Bayan session sa Reina Mercedes.

(COURTESY: DPWH)

Pinabulaanan ni Department of Public Works and Highways (DPWH) Secretary Vince Dizon nitong Huwebes ang mga ulat na babalik siya bilang kalihim ng Department of Transportation (DOTr).

Ginawa ni Dizon ang paglilinaw matapos hingan ng reaksyon kaugnay ng kumakalat na balitang magkakaroon umano ng balasahan sa Gabinete kung saan muli siyang itatalaga sa pamumuno ng DOTr.

“Kayo naman puro kayo tsismis eh. Hindi totoo ‘yan,” pahayag ni Dizon sa isang panayam matapos magsagawa ng inspeksyon sa Maysan Road sa Lungsod ng Valenzuela kasama si Mayor Wes Gatchalian.

“Basta tayo, trabaho lang tayo. Kami ni mayor, kahit saan kami, trabaho lang kami… pero hindi totoo ‘yun. ‘Wag kayong maniwala,” dagdag pa ng kalihim.

Ang DOTr ang nagsilbing comeback ni Dizon sa gobyerno sa administrasyon ni Pangulong Ferdinand R. Marcos Jr.

Pebrero 2025 nang mamuno siya sa Transportation department kapalit ni Jaime Bautista, na nagbitiw sa pwesto dahil sa mga isyung pangkalusugan. Makalipas ang halos pitong buwan, inilipat siya bilang pinuno ng DPWH matapos magbitiw si ex-Secretary Manuel Bonoan sa gitna ng flood control scandal.

Pinalitan naman si Dizon ni Giovanni Lopez bilang bagong hepe ng DOTr.

Pinabulaanan din ni Palace press officer Usec. Claire Castro ang mga isyu at sinabing walang natatanggap na impormasyon ang palasyo tungkol sa nasabing balasahan sa pamumuno.

Nitong Miyerkules, kinumpirma ni Executive Secretary Ralph Recto na pinalawig ang appointment nina Dizon at Lopez bilang mga acting secretary ng kani-kanilang mga ahensya at isusumite ng Pangulo ang kanilang mga pangalan sa Commission on Appointments.

(COURTESY: Senate of the Philippines)

Kinumpirma ng isang kinatawan mula sa Bank of the Philippine Islands (BPI) na mayroong P40.65-million joint time deposit account sina Vice President Sara Duterte at former President Rodrigo Duterte.

Inilahad ni BPI Central Manila Branches Division Head Marwin Galvez ngayong araw, October 7, sa impeachment trial proceedings na binuksan ang nasabing account sa ilalim ng pangalan ng mag-ama noong January 22, 2010 sa BPI Julia Vargas branch.

Noong binuksan ang account, isiniwalat ni Galvez na mayroon itong principal amount na P40.65 million at na-renew ito nang 12 beses kaya lumobo ang pera sa mahigit P41.7 million.

Huling beses umano na-renew ang time deposit certificate noong February 11, 2011.

Ayon kay Galvez, “If a time deposit certificate matures and is no longer renewed, proceeds of the matured time deposit is credited to the settlement account.”

Dagdag nito, sa settlement account ng mag-ama sa BPI Julia Vargas branch pumasok ang mahigit P41 million na matured amount sa pamamagitan ng isang credit memo noong March 9, 2011.

Pinambili umano ito ng manager’s check noong araw din na ‘yon.

“You can say that it’s [manager’s check] as good as cash,” ani Galvez.

Matatandaang inakusahan ni dating Sen. Antonio Trillanes IV na may hindi idineklarang BPI Julia Vargas branch account sa SALN ang noo’y presidential candidate Rodrigo Duterte na naglalaman ng higit P200 million.

Una itong pinabulaanan ni Digong pero kalauna’y inamin na may account siya sa BPI Julia Vargas branch na naglalaman ng hindi aabot sa isang milyon.

Mga kinatawan ng iba’t ibang bangko ang tumestigo ngayong araw sa impeachment court sa kabila ng patuloy na pagdinig sa Article II ng Articles of Impeachment tungkol sa alegasyon ng pagtataglay ng unexplained wealth ni VP Sara.

Nagpiyansa si Batangas 1st District Rep. Leandro Leviste sa pamamagitan ng isang kinatawan kaugnay ng inilabas na warrant of arrest laban sa kanya para sa paglabag sa Public Service Act, ayon sa National Bureau of Investigation o NBI.

Batay sa kautusan ng Makati City Regional Trial Court (RTC) Branch 235 na inilabas noong Oktubre 5, 2026, itinakda ni Presiding Judge Ricardo Aglugub Moldez II ang piyansa sa halagang P72,000 para sa pansamantalang kalayaan ng mambabatas. Si Leviste ay sinampahan ng kaso dahil sa umano’y paglabag sa Section 25 ng Commonwealth Act No. 146, na inamyendahan ng Republic Act No. 11659, na nagpaparusa sa mga public utility na nabibigong tumupad sa kanilang mga obligasyon.

Kinumpirma ni NBI Director Melvin Matibag na nakatanggap sila ng abiso mula sa korte na nagpapatunay na nagbayad ng cash bail si Leviste gayundin ang mga co-accused nito.

“Nakatanggap kami ng order mula sa korte na nag-cash bail siya. May pinadalang representative including mga co-accused niya. So technically, nasa ilalim na siya ng hurisdiksyon ng RTC Court ng Makati,” pahayag ni Matibag, na sinabing maging siya ay nagtaka noong una kung paano nakapagpiyansa ang mambabatas gayong nasa labas ito ng bansa.

Nakatakda ang arraignment o pagbasa ng sakdal kay Leviste sa Oktubre 26. Gayunpaman, nagbabala ang NBI chief na hindi na maaaring gumamit ng kinatawan ang opisyal para rito at kailangan na nitong umuwi ng Pilipinas.

“He has to attend the arraignment on Oct. 26. Otherwise, he will be issued a bench warrant na hindi siya dumalo kasi personal na ‘yan,” babala ni Matibag.

Idinagdag pa ng direktor na kung mabibigo si Leviste na humarap sa korte sa nasabing petsa, magpapalabas muli ng bagong warrant of arrest laban sa kanya at maaari na siyang ituring bilang isang pugante (fugitive from justice).

Ang kinakaharap na kasong kriminal at inilabas na arrest warrant ay sumunod sa malaking isyung kinasangkutan ng kumpanya ni Leviste sa sektor ng enerhiya. Matatandaang pinatawan ng Department of Energy (DOE) ng P24-bilyong multa ang kanyang kumpanya matapos umano itong mabigong i-deliver ang napagkasunduang 12,000 megawatts ng suplay ng kuryente. - ULAT NI PAOLO BARCELON

Agad na sinagot ni Reina Mercedes, Isabela Vice Mayor Harold Respicio ang hamon ni Interior and Local Government Secretary Jonvic Remulla na magpa-drug test matapos sabihin ng kalihim na tila wala sa tamang pag-iisip ang bise alkalde.

“Ipapa-drug test ko muna. Parang wala sa sarili eh. Ayun lang. I advise him we will give him a drug test kasi mukhang adik eh ‘yung asal niya eh,” pahayag ni Remulla sa kalagitnaan ng isang panayam.

“Meron bang normal na vice mayor na ganun? Parang wala sa sarili eh, parang hindi halal,” dagdag pa ni Remulla.

Ilang oras lamang matapos hamunin ng kalihim - kumasa kaagad si Respicio sa kalagitnaan ng kanyang interview sa At the Forefront ng Bilyonaryo News Channel.

“Sabi niya mukha daw akong nagdru-drugs at dapat daw akong ipa-drug test. Secretary Jonvic, let’s go now! Today! Punta na tayo sa St. Lukes, samahan mo ako,” hamon niya sa kalihim, habang nakasalang sa panayam kasama si Atty. Karen Jimeno.

Pasado ala-una ng hapon, nag-post si Respicio ng larawan ng resibo ng drug test na kanyang kinuha.

Resbak niya sa kalihim: “Jonvic, refund mko.”

Idinagdag pa ng kalihim na iniimbestigahan na rin ang umano’y pambabastos ni Respicio sa isang pulis na nakatayo lamang habang sinisigawan nito, subalit ipinaubaya muna niya ang paghawak sa isyu kay Isabela Governor Rodolfo Albano III.

Sa kabila nito, pinanindigan ng bise alkalde ang naging pagwawala at iginiit na mas nararapat parusahan ang mga opisyal na gumagawa ng katiwalian at umaabuso sa kanilang bayan.

“Makikita naman nila ang lahat nangyari sa live. Parusahan nila ako. Pero ang gusto ko rin mangyari parusahan nila ang nagnanakaw sa bayan namin at ang nangha-harass ng tubig o farmers kasi mas mabigat ang parusa doon,” giit ni Respicio.

Nag-ugat ang bardagulan ng dalawang opisyal ng gobyerno matapos mag-viral ang paninigaw ni Respicio sa kalagitnaan ng isang Sangguniang Bayan session sa Reina Mercedes.

(COURTESY: Facebook/Supreme Court)

Hiniling ng PDP-Laban sa Korte Suprema na ipawalang-bisa ang naging resolusyon ng Senate Impeachment Court na nagpapababa sa bilang ng boto na kailangan upang ma-convict si Vice President Sara Duterte.

Sa inihain nilang Petition for Certiorari and Prohibittion noong Oktubre 6, kinuwestiyon ng mga petitioner ang pinal na proklamasyon ng Impeachment Court noong Setyembre 23.

Sa nasabing pagdinig, nagpasya ang Senado—sa pamamagitan ng 13-1 na boto, kung saan anim na senador-hukom ang hindi nakilahok—na ang kinakailangang two-thirds majority para sa conviction ay babasehin na lamang sa bilang ng mga senador na itinuturing na “ligal at pisikal na nakakalahok” (legally and factually capable of participating) sa proseso.

Binaligtad ng nasabing proklamasyon ng Impeachment Court ang orihinal na kautusan ng Presiding Officer noong Hulyo 6 na nagtatakda sa eksaktong 16 na boto bilang basehan. Sa ilalim ng Rule XXI ng Senate impeachment rules, idinekl

ara ng hukuman na ang bagong threshold na ito ang magsisilbing “controlling ruling” o pinal na panuntunan para sa nalalabing bahagi ng paglilitis, at iginiit na ang pinal na boto sa anumang artikulo ng impeachment ay hindi na maaaring ipa-reconsider.

Sa kabilang banda, iginiit ng mga petitioner, sa pangunguna nina Senator Robinhood Padilla at Senator Bong Go, na ang basehan ng bilang ay hindi dapat ibinababa o natitinag batay sa attendance, kundi nakapako sa itinakda ng Saligang Batas.

“This case is not about whether the Vice President should be convicted or acquitted,” saad ng petitioners sa isang pahayang na inilabas ng kanilang legal counsel na si Atty, Israelito Torreon.

“It is about the number the Constitution requires before any conviction can lawfully be rendered. The Constitution says two-thirds of all the Members of the Senate. With twenty-four Senators, that is sixteen,” dagdag pa ng petitioners,

Nauna nang ibinasura ng Korte Suprema ang tatlong petisyon laban sa kaparehong resolusyon noong Setyembre 30 dahil sa procedural grounds, tulad ng kawalan ng legal standing at pagiging pre-mature. Ngunit nilinaw nina Padilla at Go na magkaiba ang kalikasan ng kanilang petisyon dahil inihain ito ng mismong mga kasalukuyang senador-hukom, kung saan ang kanilang sariling boto at posisyon ay direktang apektado sakaling ibawas sila sa pangkalahatang bilang.

Pinangalanan naman bilang mga respondent ang Senado na tumatayong Impeachment Court, si Senate President Francis Escudero bilang Presiding Officer, at ang Kamara de Representantes. Kalakip sa petisyon ang hiling para sa Status Quo Ante Order at/o Temporary Restraining Order upang pansamantalang patigilin ang pagpapatupad ng bagong panuntunan habang dinidinig ang kaso.

(COURTESY: International Criminal Court)

Umapela ang prosekusyon ng International Criminal Court (ICC) sa mga hukom ng Trial Chamber III na ibasura ang mosyon ng kampo ni dating Pangulong Rodrigo Duterte na limitahan sa 10,000 items ang mga ebidensyang ipepresenta laban sa kanya sa paglilitis ng kasong crimes against humanity.

Sa 16-pahinang tugon ng prosekusyon noong October 5, sinabi nito na hindi maaaring magtakda ng arbitraryong limitasyon sa mga ipeprepresentang ebidensya dahil makahahadlang ito sa paghahanap ng katotohanan sa kaso.

Nasa 62,034 items ang kasalukuyang naka-disclose para sa naturang kaso at 44,495 dito ay galing sa iisang dataset na naglalaman ng impormasyon tungkol sa madugong drug war ni Duterte.

Mula sa dataset na ito, 8,812 naman ang kabilang sa kabuuang 19,241 items na listahan ng ebidensya ng prosekusyon.

“It is voluminous because it records the deaths of the thousands of individuals killed by the PNP in anti-illegal drug operations and the deaths of drug personalities while Mr Duterte was President,” saad nito.

Iginiit din ng prosekusyon na paglabag sa kanilang obligasyon ang pagbabawas ng mga ebidensya para lang masunod ang gustong itakdang limit ng kampo ni Duterte.

Ani nito, “Setting an arbitrary cap on the number of documents the Prosecution can disclose would automatically place the Prosecution in violation of its disclosure obligations as it would require the Prosecution to withhold evidence that it considers material to the Defence’s preparation.”

Tinanggihan din umano ng kampo ni Duterte ang mungkahing anim na “agreed facts” ng prosekusyon na magtatanggal sana ng 42,511 items sa case record.

“It is the role of the Defence – not the Prosecution – to review the evidence disclosed to it in order to prepare for trial. The Defence has repeatedly demonstrated its reluctance to begin this work in earnest despite significant assistance from the Prosecution that goes well beyond the scope of its obligations,” dagdag ng prosekusyon.

Magsisimula sa November 30 ngayong taon ang pagdinig sa kasong crimes against humanity ni Duterte kaugnay ng kanyang giyera kontra droga habang nakaupo siya bilang presidente at alkalde ng Davao City.

(PHOTO: Senate PRIB/Senate Social Media Unit)

Isa sa bawat tatlong Pilipino ang wala umanong alam sa mga paratang laban kay Vice President Sara Duterte sa kabila ng patuloy na impeachment trial proceedings sa Senado.

Ayon sa August 2026 National Momentum Survey ng Momentum Research na isinagawa mula Agosto 18 hanggang 23, Mindanao ang may pinakamataas na porsyento ng mga Pilipinong walang nabanggit na paratang laban kay Duterte na nasa 41.9%, habang sumunod ang Visayas sa 41.6%.

(PHOTO: Momentum Research

Samantala, ang maanomalyang paggasta sa confidential at intelligence funds ang pinakakilalang paratang laban kay Duterte ng dalawa sa bawat limang Pilipino o 38.7%.

Pinakamababa naman ang bilang ng nagbanggit sa alegasyon ng hindi maipaliwanag na yaman ni Duterte na nasa 6.7%.

Ilan pa sa mga nabanggit na paratang ng mga respondent ang tangkang pagpatay sa pangulo at kamag-anak nito (14%) at panunuhol o bribery sa mga kawani ng Department of Education (13.3%).

Ayon sa Momentum Research, na isang non-partisan research firm, isinagawa ang survey habang dinidinig ng impeachment court ang Article I ng Articles of Impeachment kaugnay sa alegasyon ng maanomalyang paggamit ng confidential funds ni Duterte.

“The awareness and perceived credibility of the impeachment charges, however, could still change as the public hears more evidence on the alleged unexplained wealth and bribery,” ayon sa research firm.

Isinagawa ang August 2026 National Momentum Survey nito sa pamamagitan ng face-to-face interviews sa 1,487 respondents na may national margin of error na ±2.5 percentage points at 95% confidence level. - ulat ni Audrei Mendador

(SCREENSHOT: Facebook/Inday Sara Duterte)

DAVAO CITY (Bantay Media, Oktubre 6) - Pinabulaanan ni Bise Presidente Sara Duterte ang mga alegasyon ng korapsyon at panunuhol mula sa isang dating security aide sa pamamagitan ng paglalabas ng mga flight record, litrato, at opisyal na kalendaryo upang pasinungalingan ang mga paratang.

Sa isang press briefing, sinagot ni Duterte ang sinumpaang salaysay at mga pahayag ni Rodolfo Gracioso Jr. sa GMA News.

Inakusahan ni Gracioso, dating aide nina Marinduque Rep. Lord Allan Velasco at Rowena Velasco, na naghatid ang bise ng milyun-milyong pisong cash sa mga maleta, mamahaling sasakyan, at luxury items kay Duterte mula 2018 hanggang 2022.

Tinawag ni Duterte ang testimonya na gawa-gawa.

Kinumpirma niyang kilala niya ang mga Velasco, ngunit itinanggi niyang naging tauhan niya si Gracioso. Ayon kay Duterte, si Gracioso ay kabilang sa grupo ng mga lalaking inatasan ni Rowena Velasco upang magmanman sa kanyang asawa.

Upang pabulaanan ang mga paratang, ipinaliwanag ni Duterte na sakop siya ng mahigpit na protocol ng Presidential Security Group (PSG) mula 2016 hanggang 2022, na nagbabawal sa mga sibilyang drayber at hindi awtorisadong sasakyan na magmaneho para sa kanya. Nagpakita rin siya ng ebidensyang nasa Mindanao siya para sa kampanya noong Mahal na Araw ng 2019, at itinanggi ang byahe sa Cebu noong kasagsagan ng pandemya.

Nagbanta si Duterte na magsasampa ng P200 milyong kasong libelo laban sa GMA News dahil sa pag-ere ng hindi kumpirmadong detalye mula kay Gracioso, partikular ang pagtuturo sa umano’y bahay niya. Hinamon din niya ang National Bureau of Investigation (NBI) na sampahan ng kaso si Gracioso, matapos niyang sabihin na may ebidensyang nagpapatunay na kinausap ng NBI ang kampo ni Gracioso kalakip ang ipinangakong pabuya.

Nanindigan si Duterte na ang mga alegasyon ay atake sa pulitika at idiniin na susuportahan ng mga opisyal na dokumento ang kanyang depensa.

Mariing itinanggi ni Duterte ang pagtanggap ng mamahaling gamit, at kung gumagamit daw ito ng bag, ito raw ay para lamang may dalhin sa kanyang mga engagements.

“Wala akong tinanggap o pagmamay-ari na Hermes bag o Patek Phillip na relo. Meron kaming ‘no gifts policy’,” ayon kay Duterte.

Dagdag pa niya, nasa lahi umano ng kanilang pamilya ang diabetes. “Dahil dito umiiwas ako sa mga matamis na pagkain at bihira akong kumain ng chocolate,” sabi ng bise, sabay sundot na hindi raw Royce chocolates ang paborito nito kung sakaling kakain man siya ng mga matatamis.

Pinasinungalingan din niya ang alegasyong pagsundo sa kanya ni Gracioso sa isang pribadong hangar gamit ang puting van, dahil tanging ang PSG lamang daw ang may otoridad sa kanyang biyahe at seguridad mula 2016 hanggang 2022.

“Mula pa lamang sa simula ng termino ng aking ama, ipinaunawa na sa aming pamilya na ang mandato ng PSG ay kailangan sundin at ang PSG ang nangangasiwa ng aming seguridad... Alinsunod sa kanilang protocol, ipinagbabawal ng PSG ang ibang driver o security personnel na hindi kabilang sa PSG ang sumakay sa loob o magmaneho ng sasakyang ginagamit ko,” ayon sa Bise.

Tila naglabas din si VP Sara ng “resibo” ng kalendaryo at ebidensyang nasa Mindanao siya noong Mahal na Araw ng 2019, hindi sa Marinduque, gaya ng Nilinaw rin niyang ang luma nilang bahay sa Davao ay isang makitid na dating garahe, kaya walang “receiving area” tulad ng sinabi sa affidavit.

“Hindi totoo na pumunta ako sa Marinduque noong mahal na araw ng 2019... Panganim, may ebidensya ako na nasa Mindanao ako noong April 14 o Palm Sunday hanggang April 21 o Easter Sunday, 2019... Ang bahay namin noon ay masikip at makitid. Kaya’t wala itong receiving area.”

Sinabi rin niyang hindi galing sa isa pang testigo na si Ramil Madriaga ang ginamit na perang pambili sa kanyang Yamaha XSR900. Naglabas siya ng opisyal na resibo na nagpapatunay na sarili niyang pera ang pinambayad dito noong 2017.

Taliwas din sa alegasyong lumipad siya sa Cebu noong summer ng 2020, nagpakita si Duterte ng mga executive order na nagpapatunay na nanatili siya sa Davao upang pamunuan ang pagtugon ng lungsod sa COVID-19 lockdown.

“Hindi totoo na ako ay nasa Busay, Cebu noong bandang summer ng 2020 na panahon ng pandemic... Ako ay nasa Davao noong March 9, 2020 hanggang May 31, 2020 o buong summer. Ako ang nag-desisyon sa lahat ng gagawin sa syudad sa panahon na yun at binibigyan ko araw-araw ng update ang mga taga-Davao... Hindi ko kailanman iniwan ang mga taga-Davao sa taghirap,” ayon kay Duterte, na naging alkalde rin ng Davao mula 2016 hanggang 2022.

Sa kapareho ring presscon, sinabi ni Duterte na hindi muna siya magko-komento sa lagay ng impeachment trial at sa alegasyon ni dating Senador Antonio Trillanes, dahil ipauubaya na nito sa isa pa niyang tagapagsalita na si Atty. Paolo Panelo ang isyu. - PAOLO BARCELON